جديد ترين پوسٽ گريجوئيٽ ليبارٽري جو افتتاح ڪيو ويو، جيڪا ميون ۽ پاڙن جي معيار، مضبوطي ۽ غذائي خاصيتن جي جامع جائزي لاءِ قائم ڪئي وئي آهي. هي ليبارٽري “ليبارٽري اسٽريٿننگ پروگرام” تحت سنڌ هائر ايجوڪيشن ڪميشن (SHEC)، حڪومت سنڌ جي سهڪار سان ٺاهي وئي آهي، جنهن جو مقصد زرعي تحقيق کي جديد سائنسي اوزارن ۽ ٽيڪنالاجي سان هم آهنگ ڪرڻ آهي.
ليبارٽري ۾ جديد اوزار نصب ڪيا ويا آهن، جن ذريعي تحقيق ڪندڙ شاگرد ۽ ماهر مختلف فصلن، ميون ۽ پاڙن جي فزيولوجيڪل ۽ ڪيميائي تجزين تي ڪم ڪري سگهندا. ان سان نه رڳو زرعي معيار ۾ بهتري ايندي پر مقامي ۽ بين الاقوامي مارڪيٽن لاءِ زرعي شين جي سڃاڻپ ۽ قدر به وڌندو.
