ڪراچي (اسٽاف رپورٽر) مڪاني کاتي واري وزير ۽ پاڪستان پيپلز پارٽي ڪراچي ڊويزن جي صدر سعيد غني چيو آهي ته پاڪستان پيپلز پارٽي ڪينالن جي مسئلي تي سنڌ جي ماڻهن جي جدوجهد ۽ صدر آصف علي زرداري، چيئرمين بلاول ڀٽو زرداري ۽ وزير اعليٰ سنڌ جي ڪوششن جي تعريف ۾ پهرين مئي تي ٽاور کان سنڌ اسيمبلي چوڪ تائين هڪ عظيم ريلي منعقد ڪري رهي آهي. 24 مئي تي ڪراچي ڊويزن جي تحت ڪراچي ۾ هڪ عظيم الشان ريلي پڻ منعقد ڪئي پئي وڃي، جنهن ۾ چيئرمين بلاول
ڀٽو زرداري خاص خطاب ڪندو. اسان ڀارتي جارحيت جي سخت مذمت ڪريون ٿا ۽ پوري قوم هن معاملي تي پاڪ فوج سان گڏ بيٺي آهي. اسين سينيٽر تاج حيدر کي سندس سياسي خدمتن تي خراج تحسين پيش ڪريون ٿا. اهڙن خيالن جو اظهار هن پيپلز پارٽي ڪراچي ڊويزن جي هڪ اهم اجلاس جي صدارت ڪندي ڪيو. اجلاس ۾ پي پي پي سنڌ جي جنرل سيڪريٽري ۽ سنڌ جي وڏي وزير جي خاص مددگار سيد وقار مهدي، سنڌ جي وڏي وزير جي صلاحڪار سيد نجمي عالم، ڪراچي ڊويزن جي جنرل سيڪريٽري ۽ ضلعي ڏکڻ جي صدر جاويد ناگوري، سينئر نائب صدر عبدالرزاق ، وومين ونگ ڪراچي جي صدر ڊاڪٽر شاهده رحماني، نائب صدر مرزا مقبول، ڊپٽي انفارميشن سيڪريٽري آصف خان، سڀني ضلعن جي صدرن، جنرل سيڪريٽرين ۽ انفارميشن سيڪريٽرين، سڀني ماتحت تنظيمن جي صدرن ۽ جنرل سيڪريٽرين ۽ ٻين شرڪت ڪئي. اجلاس جي شروعات ۾ شهيد ذوالفقار علي ڀٽو، شهيد محترمه بينظير ڀٽو، تاج حيدر، شهيد عامر ڀٽو، منيرا شاڪر ۽ ٻين لاءِ فاتحه خواني ڪئي وئي. اجلاس ۾ پي پي پي جي سينئر ڪارڪن ۽ صوبائي جنرل سيڪريٽري سيد وقار مهدي کي پارٽي پاران سينيٽ ٽڪيٽ ڏيڻ تي مبارڪباد ڏني وئي. ان موقعي تي سعيد غني چيو ته اسان ڪينالن جو مسئلو حل ڪري ڇڏيو آهي، پر اڄ به مخالف ڌر ان جو ڪريڊٽ اسان کي يا سنڌ جي ماڻهن کي ڏيڻ نٿي چاهي. هن چيو ته پهرين مئي تي شام 6 وڳي ٽاور کان سنڌ اسيمبلي چوڪ تائين هڪ ريلي ڪڍي ويندي جنهن ۾ مزدورن سان يڪجهتي، ڀارتي جارحيت خلاف ۽ ڪينالن تي سنڌ جي ماڻهن جي جدوجهد ۽ صدر پاڪستان آصف علي زرداري، پارٽي چيئرمين بلاول ڀٽو زرداري ۽ سنڌ جي وڏي وزير جي ڪوششن جي شڪرگذاري جو اظهار ڪيو ويندو. جڏهن ته 24 مئي تي ڪراچي ڊويزن جي تحت هڪ عظيم الشان ريلي منعقد ڪئي ويندي، جنهن ۾ سڄي سنڌ مان وڏي انگ ۾ ماڻهو شرڪت ڪندا. سعيد غني چيو ته چيئرمين بلاول ڀٽو زرداري جلسي کي خطاب ڪندو. اجلاس ۾ پيپلز پارٽي جي سينئر اڳواڻ سينيٽر تاج حيدر جي سياسي خدمتن، هندستاني جارحيت خلاف سنڌ جي ماڻهن جي جدوجهد ۽ ڪينالن جي مسئلي ۽ پيپلز پارٽي پاران ان خلاف سي سي آءِ جي منظوري بابت ٽي قراردادون متفقه طور تي منظور ڪيون ويون. ان موقعي تي پيپلز پارٽي ڪراچي ڊويزن جي جنرل سيڪريٽري جاويد ناگوري چيو ته پيپلز پارٽي ڪينال جي معاملي تي هڪ وڏي سازش کان بچي وئي آهي. هن چيو ته سنڌ جي ماڻهن پاران ان سلسلي ۾ ڪيل ڪوششن سڄي ملڪ جي ماڻهن کي حيران ڪري ڇڏيون آهن. اجلاس کي خطاب ڪندي پيپلز ليبر بيورو ڪراچي ڊويزن جي صدر اسلم سمون چيو ته اربع 30 اپريل تي شام 5 وڳي پيپلز ليبر بيورو پاران آرٽس ڪائونسل ڪراچي ۾ مئي ڊي جي حوالي سان مزدورن جي گڏجاڻي منعقد ڪئي پئي وڃي، جنهن کي صوبائي ۽ ڪراچي ڊويزن ۽ مزدور اڳواڻ خطاب ڪندا.
