تاريخ 23 نومبر 2024
.صوبائي وزير ناصر شاهه پاران ايڪسپو سينٽر ۾ 4 ڏينهن واري عالمي دفاعي نمائش آئيڊياز 2024 ڪاميابي سان منعقد ڪرڻ تي خراج تحسين
ڪراچي (23 نومبر): توانائي، منصوبابندي ۽ ترقي واري صوبائي وزير سيد ناصر حسين شاهه ايڪسپو سينٽر ۾ 4 ڏينهن واري عالمي دفاعي نمائش آئيڊياز 2024ع جي ڪامياب انعقاد تي کيس خراج تحسين پيش ڪندي پنهنجي بيان ۾ چيو آهي ته ڪراچي ۾ بين الاقوامي دفاعي نمائش ۽ سيمينار (Ideas 2024) منعقد ڪرڻ اسان سڀني لاءِ فخر جي ڳالهه آهي. هن چيو ته دفاعي نمائش آئيڊياز 2024ع ۾ دفاعي، جنگي ۽ فوجي سامان جي خريداري ۽ وڪري لاءِ اربين رپين جا 82 معاهدا ڪيا ويا. آئيڊياز 2024 دفاعي مارڪيٽ جي نمائش، سيلز، گڏيل منصوبن، آئوٽ سورسنگ ۽ ٽيڪنيڪل تعاون ۾ هڪ اهم سنگ ميل آهي. هن وڌيڪ چيو ته آئيڊياز 2024 پاڪستان جي دفاعي مارڪيٽ جي ترقي لاءِ بين الاقوامي تعاون، ڪاروباري موقعن ۽ مقامي صنعت جي ترقي لاءِ راهه هموار ڪري ٿو. ناصر شاهه چيو ته آئيڊيا 2024 ان ڳالهه جي عڪاسي ڪري ٿو ته پاڪستان جتي به امن ۽ خوشحالي چاهي ٿو دفاعي صلاحيت ۾ ڪنهن کان پوئتي ناهي. هن چيو ته ملڪ ۾ سيڙپڪاري ۽ گڏيل منصوبن جا وڏا موقعا موجود آهن. پاڪستاني معيشت مثبت اشارن ڏانهن وڌي رهيو آهي. پاڪستان دنيا ۾ امن قائم ڪرڻ لاءِ پنهنجو منفرد ڪردار ادا ڪري رهيو آهي ۽ دهشتگردن خلاف ڪيترائي قربانيون ڏئي رهيو آهي. هن چيو ته پاڪستان ترقي طرف وڌي رهيو آهي ان ڪري هڪ صوبائي حڪومت سرڪاري سامان ۽ مشينري سان اسلام آباد تي ڪاهه ڪرڻ جي ڪوشش ڪري رهي آهي. ٻئي پاسي ساڳي ايجنڊا جي هڪ غير سياسي عورت پاڪستان ۽ سعودي عرب جا لاڳاپا خراب ڪرڻ چاهي ٿي. ناصر شاهه چيو ته دهشتگرد پارا چنار ۾ بيگناهه مسافرن جو قتل عام ڪري رهيا آهن، ڪي پي جي صوبائي حڪومت اسلام آباد تي حملي جي تياري ڪري رهي آهي ۽ تحريڪ انصاف جي سموري قيادت پنهنجي انتشار پسند باني جي فلسفي ”مان نه ته ڪجهه نه“ تي عمل ڪري رهي آهي. هن چيو ته تحريڪ انصاف هميشه ملڪ ۾ انتشار ۽ غير يقيني صورتحال پيدا ڪرڻ جي ناڪام ڪوشش ڪئي آهي. ياد رهي ته پاڪستان ۾ ڪنهن به قسم جي افراتفري کي برداشت نه ڪيو ويندو ۽ بدمعاشي، ڌرڻن ۽ حملن جي اجازت نه ڏني ويندي.
محمد شبيه صديقي
ڊائريڪٽر اطلاعات/ڊائريڪٽر ميڊيا مئنيجمينٽ
صوبائي وزير توانائي ۽ پي اينڊ ڊي سنڌ
