ڪراچي (17 آگسٽ) سنڌ جي وڏي وزير سيد مراد علي شاهه 10 ڏينهن واري پوليو جي خاتمي واري مهم دوران پوليو جا ڦڙا پيارڻ کان انڪار ڪرڻ جو سخت نوٽيس وٺندي چيو آهي ته پوليو جا ڦڙا پيارڻ کان انڪار جي ڪا به گنجائش ناهي، والدين کي درخواست ڪجي ٿي ته پوليو جهڙي موذي مرض جي خاتمي لاءِ صوبائي حڪومت ۽ ملڪ سان تعاون ڪن. وزيراعليٰ هائوس مان جاري ڪيل بيان ۾ وڏي وزير سيد مراد علي شاهه صحت کاتي کي پوليو جي خاتمي واري مهم کي وڌيڪ موثر بڻائڻ جي هدايت ڪئي. هن چيو ته مان والدين جو ڪو به عذر قبول نه ڪندس. 5 سالن کان گهٽ عمر جي سڀني ٻارن کي پوليو جا ڦڙا پياريا ويندا. هن ضلعي انتظاميا ۽ پوليس کي حڪم ڏنو ته انڪار جي صورت ۾ سخت ڪارروائي ڪئي وڃي. وڏي وزير وڌيڪ چيو ته دنيا جا ننڍا ۽ ترقي يافته ملڪ به پوليو جهڙي موذي مرض کان ڇوٽڪارو حاصل ڪري چڪا آهن پر پاڪستان ۽ افغانستان ۾ اڃا به ڪجهه والدين پنهنجي ٻارن کي پوليو جا ڦڙا پيارڻ کان پاسو ڪن ٿا، جنهن سبب وائرس جي پکيڙ ۾ واڌ ٿي رهي آهي. وڏي وزير چيو ته هاڻي ڪنهن به والدين کي پنهنجي ٻارن کي پوليو جا ڦڙا پيارڻ کان انڪار ڪرڻ جي اجازت نه ڏني ويندي. هن چيو ته پوليو هڪ حساس مسئلو آهي. پوليو انتظاميه جي تعصب، غلط فهمي ۽ غلط بياني هڪ سنگين مسئلو آهي. هن چيو ته حڪومت ان حوالي سان مڪمل آگاهي فراهم ڪري رهي آهي.وڏي وزير والدين تي زور ڀريو ته هو حڪومت تي اعتماد ڪن. سنڌ حڪومت هن قوم جي ٻارن جي بهتر مستقبل کي چڱي طرح سمجهي ٿي. وڏي وزير چيو ته اسان پوليو فري پاڪستان چاهيون ٿا ۽ سنڌ حڪومت ان حوالي سان والدين جو ڪردار ادا ڪندي. واضح رهي ته وڏي وزير سيد مراد علي شاهه پوليو کان ڇوٽڪارو حاصل ڪرڻ لاءِ 14 آگسٽ تي 10 ڏينهن واري اهم مهم شروع ڪئي هئي. وڏي وزير چيو ته شهر جي 85 يونين ڪائونسلن ۾ پوليو جي خاتمي خلاف خصوصي مهم شروع ڪئي وئي آهي، جنهن تحت پنجن سالن کان گهٽ عمر جي 11 لک کان وڌيڪ ٻارن کي پوليو جا ڦڙا پياريا ويندا. مهم تحت، 1,037,000 ٻارن کي (4 مهينن کان پنجن سالن جي عمر) جي ٻارن کي جزوي طور تي پوليو ويڪسين (f-IPV) جا انجيڪشن لڳايا ويندا. مراد علي شاهه انتظاميا ۽ صحت کاتي کي سخت هدايتون ڏيندي چيو ته پوليو مهم کي هر صورت ۾ ڪامياب بڻايو وڃي ۽ هدف مڪمل ڪري کيس رپورٽ پيش ڪئي وڃي.
—
========================
