ڪراچي (3 مئي): سنڌ جي وڏي وزير سيد مراد علي شاهه چيو آهي ته سندس حڪومت ٻارن جي مستقبل کي محفوظ بڻائڻ لاءِ اسٽنٽنگ سميت هر قسم جي غذائي کوٽ جي خاتمي لاءِ ٺوس قدم کڻڻ لاءِ پرعزم آهي. هن اها ڳالهه اڄ مقامي هوٽل ۾ رٿابندي ۽ ترقيات کاتي پاران ورلڊ بئنڪ جي سهڪار سان منعقد ڪيل ”سنڌ ۾ اسٽنٽنگ ۽ غذائيت جي خاتمي بابت ملٽي سيڪٽرل اسٽريٽجي“ جي موضوع هيٺ هڪ ورڪشاپ کي خطاب ڪندي چئي. پروگرام ۾ صوبائي وزير پي اينڊ ڊي سيد ناصر شاهه، صحت واري صوبائي وزير ڊاڪٽر عذرا فضل پيچوهو، چيف سيڪريٽري آصف حيدر شاهه، ورلڊ بينڪ جي ڪنٽري ڊائريڪٽر مسٽر ناجي بينحسين، ورلڊ بينڪ جي ريجنل ڊائريڪٽر مسز نڪول ڪلنگن ۽ ٻين شرڪت ڪئي. وڏي وزير چيو ته سندس حڪومت صوبي ۾ اسٽنٽنگ جي موجوده شرح کي گهٽائڻ جي ڪوشش ڪري رهي آهي. هن پنهنجي خطاب ۾ چيو ته جڏهن هن وزيراعليٰ جو عهدو سنڀاليو ته هن اسٽنٽنگ کي گهٽائڻ لاءِ ايڪسلريٽڊ ايڪشن پلان شروع ڪيو. 2017 ۾ ورلڊ بئنڪ جي مدد سان سنڌ حڪومت اسٽنٽنگ ۽ ٻين قسمن جي غذائيت کي گھٽائڻ لاءِ ملٽي سيڪٽرل اسٽريٽجي اختيار ڪيو. هن پروگرام ۾ غذائي حساس شعبن جهڙوڪ لائيو اسٽاڪ، فشريز ۽ زراعت شامل هئا. ڪيترين ئي صحت جي سهولتن ۾ هاڻي آئوٽ پيشنٽ ٿراپيٽڪ پروگرام (OTP) سائيٽون آهن جيڪي خاص طور تي غذائيت جو شڪار ٻارن لاءِ ٺهيل آهن. ان کان علاوه ڍورن کي متاثر ٿيل ڪميونٽين خاص طور ڳورهارين ۽ کير پيارئيندڙ عورتن جي گهراڻن ۾ ورهايو ويو. سنڌ حڪومت ۽ ان جي ترقياتي ڀائيوارن هن ڳڻتي جوڳي مسئلي کي موثر طريقي سان حل ڪرڻ جي هر ممڪن ڪوشش ڪئي آهي. وڏي وزير چيو ته 2022ع ۾ سنڌ ۾ آيل مهاٻوڏ سنڌ جي عوام کي تباهه ڪيو. ان آفت تعليم، صحت، زراعت ۽ جانورن سميت سماج جي هر شعبي کي متاثر ڪيو پر زمين جو وڏو حصو ڪيترن ئي هفتن تائين پاڻي هيٺ رهيو. وڏي وزير چيو ته سنڌ حڪومت جي ترجيح انساني زندگين کي بچائڻ ۽ اهڙي آفت ۾ موجود ماڻهن کي پناهه ڏيڻ آهي. ۽ وڌيڪ چيو ته 20 هزار اسڪول جزوي يا مڪمل طور تي تباهه ٿيا ۽ سوين صحت جون سهولتون پاڻي ۾ ٻڏي ويون پر اسان جي حڪومت آزمائش ۽ مصيبت جي هن گهڙي ۾ عوام سان گڏ آهي. مراد شاهه چيو ته غربت، آمدني ۽ سماجي تحفظ جو سڌو سنئون اثر 5 سالن کان گهٽ عمر جي ٻارن جي اسٽنٽنگ تي آهي. سنڌ حڪومت سوشل سيڪيورٽي لاءِ کاتو قائم ڪيو آهي ۽ ورلڊ بئنڪ جي سهڪار سان سوشل سيڪيورٽي اسٽريٽجي يونٽ شروع ڪيو آهي جنهن تحت فائدو وٺندڙن کي سڌي ريت نقد رقم جي منتقلي شامل آهي. ان کان علاوه حڪومت ڳورهارين ۽ ٿڃ پياريندڙ عورتن کي مناسب غذائيت فراهم ڪرڻ لاءِ ’1000 ڏينهن‘ نالي هڪ صحت جو منصوبو شروع ڪيو آهي جنهن سان نون ڄاول ٻارن ۾ غذائي کوٽ جا امڪان گهٽجي سگهن ٿا. بهرحال انهن پروگرامن کي ڪميونٽي جي ضرورتن کي پورو ڪرڻ لاء وڌيڪ ڪوريج ۽ شدت جي ضرورت آهي. وڏي وزير چيو ته اسٽنٽنگ هڪ سنگين مسئلو آهي جنهن کي سنجيدگي سان منهن ڏيڻ جي ضرورت آهي. هن چيو ته منهنجي حڪومت ان مسئلي جي حل لاءِ پرعزم آهي جڏهن ته رٿابندي ۽ ترقيات کاتي ۾ هڪ ٽاسڪ فورس قائم ڪئي وئي آهي جنهن جو مقصد سمورن شعبن کي هڪ پليٽ فارم تي گڏ ڪري غذائي کوٽ جي خاتمي لاءِ آهي. ۽ چيو ته اسان کي عالمي بئنڪ ۽ ٻين ڊيولپمينٽ پارٽنرز کان ٽيڪنيڪل سپورٽ جي ضرورت آهي ته جيئن اسٽنٽنگ جي گھڻ رخي سببن کي منهن ڏيڻ لاءِ لاڳاپيل کاتن جي صلاحيت کي وڌايو وڃي. هن چيو ته مون اڪثر ٻڌو آهي ڊومين جي ماهرن کي چوندا آهن ته جيڪڏهن توهان هڪ ڊالر هڪ اسٽنٽ ٿيل ٻار تي لڳايو ته اهو بالغ ٿيڻ تائين 16 ڊالر واپس ڪندو. وڏي وزير چيو ته سنڌ حڪومت هر قسم جي غذائي کوٽ کان نجات حاصل ڪرڻ ۽ ٻارن جي مستقبل کي بچائڻ لاءِ ٺوس قدم کڻڻ لاءِ پرعزم آهي. هن وڌيڪ چيو ته هو صوبائي وزير ۽ چيئرمين پي اينڊ ڊي کي هدايت ڪندو ته هو سمورن شعبن ۽ کاتن جي ڪوآرڊينيشن کي مضبوط ڪن ۽ اسٽنٽنگ کي منهن ڏيڻ لاءِ گڏجي ڪم ڪن ته جيئن مستقبل ۾ بهتر نتيجا حاصل ڪري سگهجن. هن اهڙو اهم ورڪشاپ منعقد ڪرڻ تي ورلڊ بئنڪ جي ٽيم ۽ رٿابندي ۽ ترقيات کاتي جو شڪريو ادا ڪيو جنهن اسان سڀني جي آگاهي لاءِ صحت، زراعت، لائيو اسٽاڪ، فشريز، سوشل سيڪيورٽي ۽ تعليم سميت سمورن لاڳاپيل شعبن کي گڏ ڪيو. هن چيو ته انهن سمورن شعبن کي پنهنجي روايتي ڪمن کان هٽي ڪري ضلعن ۾ پنهنجي پنهنجي ڪوششن ۽ وسيلن سان اسٽنٽنگ کي گهٽائڻ لاءِ قدم کڻڻ گهرجن. پي اينڊ ڊي واري وزير سيد ناصر شاهه سمورن مهمانن خاص ڪري ورلڊ بينڪ جي ڪنٽري ڊائريڪٽر ۽ سندس ٽيم کي ورڪشاپ ۾ شرڪت تي ڀليڪار ڪيو. ان موقعي تي صوبائي وزير پي اينڊ ڊي ناصر شاهه پنهنجي خطاب ۾ چيو ته سنڌ حڪومت عالمي بئنڪ جي سهڪار سان 2017ع ۾ ان رجحان کي گهٽائڻ لاءِ قدم کنيا هئا. ۽ ان جي خلاف جنگ جاري رکڻ لاءِ رٿابندي ۽ ترقيات کاتي ۾ هڪ ملٽي سيڪٽرل ٽاسڪ فورس قائم ڪئي وئي، ان وقت کان وٺي اسان اسٽننگ ۽ غذائيت کي ڪنٽرول ڪرڻ لاءِ گھڻ رخي ڪوششون ڪري رهيا آهيون. صورتحال جي سنگيني ۽ بحران کي نظر ۾ رکندي صوبائي حڪومت ڪوششون تيز ڪرڻ ۽ سندس منهن ڏيڻ لاءِ موجوده ميڪنزم کي وڌائڻ جي سخت ضرورت آهي. ناصر شاهه چيو ته هي ورڪشاپ سنڌ ۾ خاص طور تي 2022ع جي ٻوڏ کانپوءِ غذائي کوٽ ۽ خراب ٿيندڙ صورتحال جي باري ۾ اسان جي سمجھ ۾ اضافو ڪندو ۽ اسان کي اڳ جي ڀيٽ ۾ بهتر نموني سان وڙهڻ لاءِ نئين حالتن کي ڳولڻ جي قابل بڻائيندو. ان موقعي تي ورلڊ بئنڪ جي ڪنٽري ڊائريڪٽر مسٽر ناجي بينهسن، ورلڊ بئنڪ جي ريجنل ڊائريڪٽر مسز نڪول ڪلنگن ۽ ٻين پڻ خطاب ڪيو.
عبدالرشيد چنا
ميڊيا ڪنسلٽنٽ، وزيراعليٰ سنڌ
