وڏي وزير جسٽس باقر پاران عرشي منزل جي متاثرن کي رهائش فراهم ڪرڻ جي خاطري

اس پوسٹ کو شیئر کریں

ڪراچي (7 ڊسمبر): سنڌ جي نگران وڏي وزير جسٽس (ر) مقبول باقر چيو آهي ته عائشه منزل جي 6 ماڙ ڪمرشل ۽ رهائشي عمارت عرشي منزل ۾ باهه لڳڻ وارو واقعو سنڌ بلڊنگ ڪنٽرول اٿارٽي (SBCA) سميت ٻين لاڳاپيل شهري ادارن ۽ کين آفيسرن جي نااهلي، مڪمل ناڪامي ۽ مجرماڻي غفلت جو نتيجو آهي. هن افسوس جو اظهار ڪندي چيو ته جيڪڏهن ايس بي سي اي سمورن بلڊنگ ڪوڊز تي عمل ڪري ها ته ايتري وڏي باهه لڳڻ سبب 3 معصوم جانيون ضايع نه ٿين ها ۽ 74 اپارٽمنٽ ۽ 130 دڪان سڙي رک نه ٿين ها. ۽ وڌيڪ چيو ته واقعي جي جاچ جو حڪم ڏئي ڇڏيو آهي جنهن ۾ جوابدارن جي نشاندهي ڪئي ويندي ته جيئن کين قانون جي ڪٽهڙي ۾ آندو وڃي. هن چيو ته هر عمارت کي فائر سيفٽي سسٽم ۽ فائر ٽينڊر پهچڻ لاءِ رستا ڏيڻ گهرجن پر افسوس جو اهي سڀ اهم حفاظتي اپاءَ نظر انداز ڪيا ويا آهن.هن چيو ته مون اهڙي قسم جي واقعن کان بچڻ لاءِ سرڪاري ۽ خانگي عمارتن جي سيفٽي ۽ سيڪيورٽي آڊٽ جا حڪم اڳ ئي جاري ڪيا هئا. هن وڌيڪ چيو ته هو خامين کي ختم ڪرڻ لاءِ سمورن اهم عمارتن جي محفوظ ۽ سڪيورٽي آڊٽ کي يقيني بڻائيندو. وڏي وزير چيو ته رهائشين ۽ واپارين کي ٿيل نقصان جو ڪاٿو لڳايو ويندو. هڪ سوال جي جواب ۾ وڏي وزير چيو ته هن ضلعي انتظاميا کي هدايت ڪئي آهي ته جيستائين ايس بي سي اي عمارت جو معائنو ڪري صورتحال جو اعلان نه ڪري تيستائين ڪنهن کي به سڙيل اپارٽمنٽ ۾ رهڻ جي اجازت نه ڏني وڃي. هن چيو ته مون ضلعي انتظاميا کي هدايت ڪئي آهي ته متاثرن لاءِ ڪئمپ قائم ڪئي وڃي ته جيئن عمارت جو معائنو ٿيڻ تائين اهي اتي ئي رهن. ۽ وڌيڪ چيو ته اپارٽمنٽ تي قبضو ڪندڙن کي رڳو هڪ هڪ ڪري پنهنجي فليٽ ۾ وڃڻ ۽ پنهنجي گهرن کي محفوظ ڪرڻ ۽ اپارٽمنٽ کي تالو هڻڻ جي اجازت ڏني ويندي. ڊپٽي ڪمشنر متاثر خاندانن جي رهائش لاءِ مولانا الطاف حسين حالي، عزيز آباد ۽ علامه شبير عثماني بلاڪ 14 ايف بي ايريا ۾ ٻه اسڪول عمارتون مقرر ڪيون آهن. ان کان اڳ وڏي وزير سڙيل عمارتن ۽ دڪانن جو معائنو ڪيو ۽ متاثرن سان ملاقات ڪئي. هنن وڏي وزير کي ٻڌايو ته باهه لڳڻ سبب 74 اپارٽمنٽس ۽ 130 دڪان سڙي فوت ٿي ويا جڏهن ته عمارت جي پوئين پاسي جا فليٽ محفوظ رهيا. ڊپٽي ڪمشنر سينٽرل فواد سومرو واقعي واري هنڌ تي وڏي وزير کي بريفنگ ڏيندي ٻڌايو ته عرشي منزل گلبرگ سب ڊويزن ۾ اربع جي شام 5 کان ساڍي 5 وڳي تائين مبينا طور تي شارٽ سرڪٽ سبب باهه لڳي. هن وڌيڪ ٻڌايو ته باهه شروع ۾ گرائونڊ فلور تي واقع ڪمرشل شاپ ۾ لڳي جتي فرنيچر، گدا، عطر ۽ جيوري جي ڪيترن ئي دڪانن کي اوچتو باهه لڳڻ سبب چار ماڙ رهائشي عمارت کي باهه وڪوڙي وڌو. ٻڌايو پيو وڃي ته فائر برگيڊ ۽ ريسڪيو 1122 وقت سِر موقعي تي پهچي باهه تي ضابطو آندو، باهه ايڏي وڏي هئي جو باهه وسائڻ ۾ ڪافي وقت لڳي ويو. بريفنگ ۾ ٻڌايو ويو ته ضلعي انتظاميا، پوليس، رينجرز ۽ فائر فائٽرز ڪامياب ريسڪيو آپريشن ڪيو ۽ رات 10:27 منٽن تي ٽن ڄڻن جا لاش ڪڍيا ويا جن کي عباسي شهيد اسپتال منتقل ڪيو ويو.
عبدالرشيد چنا
ميڊيا ڪنسلٽنٽ، وزيراعليٰ سنڌ

ڪراچي (7 ڊسمبر): سنڌ جي نگران وڏي وزير جسٽس (ر) مقبول باقر چيو آهي ته ٽيڪنالاجي جي تيز رفتار هن دور ۾ اسان رڳو روايتي طريقن تي ڀاڙي نٿا سگهون، اسان کي نيون ٽيڪنالاجيون اختيار ڪرڻيون پونديون جيڪي اسان جي عوام کي صحت جون بهتر خدمتون مهيا ڪرڻ ۾ مدد ڪن. هن اها ڳالهه آغا خان يونيورسٽي جي سهڪار سان منعقد ڪيل هيلٿ ٽيڪنڪ سمٽ کي خطاب ڪندي چئي. تقريب ۾ آغا خان يونيورسٽي جي صدر سليمان شهاب الدين، چيئرمين ذاڪر محمود ۽ ٻين شرڪت ڪئي. وڏي وزير چيو ته صحت جو شعبو ڪنهن به سماج ۽ حڪومت لاءِ انتهائي اهم شعبو آهي، صحت جو شعبو ترقي پذير ملڪن لاءِ انتهائي حساس شعبو آهي ۽ اهوئي سبب آهي پاڪستان کي به ان شعبي ۾ مختلف چئلينجن کي منهن ڏيڻو پئجي رهيو آهي. هن چيو ته غريب ۽ پٺتي پيل طبقن ۾ انساني صحت تي اثرانداز ٿيندڙ مسئلن کي ڏسندي صحت جي شعبي ۾ منهنجي حڪومت پهرئين ترجيح ڏني آهي. جسٽس (ر) مقبول باقر چيو ته گذريل 5 سالن ۾ سنڌ جي صحت کاتي سرڪاري ۽ خانگي صحت جي ادارن کي گرانٽ ان ايڊ ۾ ٻيڻو اضافو ڪيو آهي جڏهن ته ان جي ترقياتي پورٽ فوليو ۾ 70 سيڪڙو جي لڳ ڀڳ واڌ ٿيو آهي. هن چيو ته اسان صوبي ۾ صحت جي شعبي کي بهتر بڻائڻ لاءِ ڪيترائي قدم کنيا آهن جيئن ته سرڪاري اسپتالن ۽ ڪلينڪ جي تعداد، گنجائش ۽ معيار کي وڌائڻ سان گڏ پرائمري ۽ سيڪنڊري سطح تي صحت جي نظام کي مضبوط ڪرڻ شامل آهن. هن چيو ته اسان صحت جي شعبي ۾ وڌيڪ بهتري آڻڻ لاءِ احتساب ۽ سکيا جي عمل کي وڌيڪ موثر بڻايو آهي ۽ اسان پرائمري ۽ سيڪنڊري سهولتن جي فراهمي جي حوالي سان جديد مانيٽرنگ سسٽم متعارف ڪرايو آهي. هن چيو ته اسان سنڌ ۾ ماءُ ۽ ٻار جي صحت لاءِ سنڌ انٽيگريٽيڊ هيلٿ اينڊ پاپوليشن پروگرام جي بنياد وڌي آهي. سنڌ جي نگران وڏي وزير چيو ته ان پروگرام جو مقصد ماءُ ۽ ٻار جي صحت جي تندرستي لاءِ بنيادي سهولتون فراهم ڪرڻ آهي. هن چيو ته پروگرام پرائمري ڪيئر سهولتن ۽ ثانوي اسپتالن جي وچ ۾ ٽيلي هيلٿ ۽ ٽيلي ميڊيسن نيٽ ورڪ پڻ قائم ڪري رهيو آهي ته جيئن سڀني شهرين کي صحت جي سهولتن تائين معيار ۽ يقيني رسائي حاصل ٿئي. نگران وڏي وزير چيو ته ٽيڪنالاجي جي هن دور ۾ اسان رڳو روايتي طريقن تي نٿا ڀاڙي سگهون. اسان کي جدت ۽ نيون ٽيڪنالاجيون اپنائڻ جي ضرورت آهي ته جيئن اسان پنهنجي ماڻهن کي بهتر صحت جون خدمتون فراهم ڪري سگهون. هن وڌيڪ چيو ته آغا خان يونيورسٽي سمٽ جي تقريب جو مقصد اهم شعبن تي ڌيان ڏيڻ آهي جتي صحت جي ٽيڪنالاجي ذريعي بهتري آڻي سگهجي ٿي. جسٽس (ر) مقبول باقر اميد ظاهر ڪئي ته آغا خان يونيورسٽي پاران منعقد ڪيل پروگرام ويچارن جي ڏي وٺ کي آسان بڻائيندو ۽ پارٽنرشپ قائم ڪندو جڏهن ته پاڪستان ۾ صحت جي شعبي کي بهتر بڻائڻ لاءِ ڪم ڪندڙ سمورن اسٽيڪ هولڊرن جي وچ ۾ هم آهنگي پيدا ڪندو. ان کان اڳ اي ڪي يو جي صدر سليمان شهاب الدين سنڌ جي نگران وڏي وزير جو استقبال ڪيو ۽ کيس سمٽ جي مقصدن کان آگاهه ڪيو.
عبدالرشيد چنا
ميڊيا ڪنسلٽنٽ، وزيراعليٰ سنڌ