ڪراچي (22 آڪٽوبر): سنڌ جي وڏي وزير سيد مراد علي شاهه پريس ڪانفرنس کي خطاب ڪندي اعلان ڪيو ته صوبائي حڪومت ڪڻڪ جي امدادي قيمت 3500 رپيا في مڻ مقرر ڪئي آهي جڏهن ته فصل 2025-26 دوران 8 لک کان 12 لک ٽن ڪڻڪ خريد ڪرڻ جو منصوبو تيار ڪيو ويو آهي۔ وڏي وزير ٻڌايو ته هي قدم 55 ارب رپين جي رليف پيڪيج جو حصو آهي جنهن ۾ پوک جي وڌندڙ خرچن کي گهٽائڻ ۽ آبادگارن جي آمدني ۾ بهتري لاءِ ڊي اي پي ۽ يوريا ڀاڻ تي وڏيون سبسڊيون شامل آهن۔ پريس ڪانفرنس ۾ وڏي وزير سان گڏ صوبائي وزير شرجيل ميمڻ، سردار محمد بخش مهر ۽ مخدوم محبوب زمان پڻ موجود هئا۔ مراد علي شاهه چيو ته ڪڻڪ جي خريداري مارڪيٽ جي استحڪام ۽ آبادگارن کي وچولين جي استحصال کان بچائڻ لاءِ ضروري آهي۔ حڪومت جو مقصد اهو آهي ته ڀاڻ جي وقت سر فراهمي، شفاف خريداري، ۽ آبادگارن کي فوري ادائيگي يقيني بڻائي وڃي ته جيئن اهي گندم جي پوک ۾ دلچسپي برقرار رکن ۽ خوراڪ ۾ خودڪفالت حاصل ڪري سگهن۔ هن چيو ته سنڌ حڪومت آبادگارن لاءِ گهٽ ۾ گهٽ امدادي قيمت مقرر ڪرڻ جي حمايت ڪري ٿي جنهن سان انهن کي پنهنجي محنت جو منصفاڻو معاوضو ملي ٿو۔ وڏي وزير چيو امدادي قيمت آبادگارن کي اعتماد ڏئي ٿي ته انهن جي محنت جي قدر ڪئي پئي وڃي۔ مراد علي شاهه ٻڌايو ته وفاقي حڪومت ۽ آءِ ايم ايف جي شرطن سبب شروعاتي ڏکيائون پيش آيون پر چيئرمين بلاول ڀٽو زرداري جي ڪوششن سان وفاقي منظوري حاصل ٿي۔ هي ڪاميابي محدود مالي وسيلن باوجود گڏيل حڪمت عملي سان ٿيل اثرائتي ڳالهين جي اهميت کي ظاهر ڪري ٿي۔ هن چيو ته 2023-24 ۾ سنڌ حڪومت جي ڪامياب ڪڻڪ خريداري مهم مارڪيٽ کي مستحڪم رکيو، اٽي جي کوٽ کان بچايو ۽ قيمتي زرمبادلي جي بچت ڪئي۔ وڏي وزير ٻڌايو ته سنڌ حڪومت شروع ۾ 4000 رپيا في من جي سفارش ڪئي هئي پر آبادگارن کي جلد فائدو پهچائڻ لاءِ وفاقي سطح تي مقرر ٿيل 3500 رپيا جي شرح قبول ڪئي وئي۔ هن چيو ته هن سال سنڌ حڪومت 8 کان 12 لک ٽن ڪڻڪ خريد ڪندي ۽ ضلعي انتظاميا کي شفاف ۽ وقت سر ڪارروائي لاءِ متحرڪ ڪيو ويو آهي۔ رليف پيڪيج ۾ هر ايڪڙ لاءِ هڪ ڊي اي پي ۽ ٻه يوريا جا ٿلها ڏيڻ جو منصوبو پڻ شامل آهي۔ وڏي وزير چيو ته بلاول ڀٽو زرداري جي قيادت هيٺ سنڌ حڪومت پنهنجي پاليسين لاءِ وفاق کان منظوري حاصل ڪئي جن ۾ منصفاڻي امدادي قيمت، زرعي ٽيڪس ۾ نظرثاني، ۽ ٽيڻ ڀيرا ٽيڪس لاڳو ڪرڻ کي ملتوي ڪرڻ شامل آهي۔ هن چيو ته مستحڪم گهٽ ۾ گهٽ قيمتن جي پاليسي مهانگين درآمدن کان بچائي مقامي پيداوار کي همٿايو آهي۔ مراد علي شاهه تسليم ڪيو ته ڀاڻ جي کوٽ ۽ ٻيا مسئلا فصل تي اثرانداز ٿيا پر صوبائي حڪومت سڌي مدد ذريعي انهن کي حل ڪرڻ لاءِ قدم کڻي رهي آهي۔ زرعي آمدني ٽيڪس جي حوالي سان وفاق سان ڳالهين کان پوءِ آبادگارن کي عارضي رليف ڏنو ويو آهي۔ هن چيو ته سنڌ حڪومت متوازن زرعي ترقي ۽ معاشي استحڪام کي اوليت ڏئي رهي آهي۔ فوڊ ۽ زراعت وارا کاتا گڏجي گندم جي خريداري ۽ ڀاڻ جي ورهاست کي يقيني بڻائيندا۔ قانون ۽ امن جي صورتحال: هڪ سوال جي جواب ۾ وڏي وزير چيو ته حڪومت شهري ۽ ديهي سنڌ ٻنهي ۾ امن امان قائم رکڻ تي مڪمل ڌيان ڏئي رهي آهي۔ هن چيو اسان کي ٻه وڏا چئلينج آهن ڳوٺاڻن علائقن ۾ ڌاڙيلن جو مسئلو ۽ شهري مرڪزن ۾ اسٽريٽ ڪرائم۔ ڪجهه فرقيتاڻي واقعا به پيش آيا پر انهن کي سختي سان منهن ڏنو پيو وڃي۔ وڏي وزير ٻڌايو ته سنڌ پوليس کي جديد تربيت، ٽيڪنالاجي ۽ بهتر هم آهنگي سان مضبوط ڪيو پيو وڃي ته جيئن اهي خطرن کي وڌيڪ مؤثر طريقي سان منهن ڏئي سگهن۔ افغان شهرين جي واپسي پاليسي: وفاقي حڪومت جي افغان شهري موٽڻ بابت فيصلي تي ڳالهائيندي وڏي وزير چيو هاڻي قومي سطح تي اتفاق آهي ته سڀ افغان پناهگير پنهنجي ملڪ واپس ويندا۔ هن چيو ته سنڌ حڪومت وفاقي پاليسي تي مڪمل عمل ڪندي ۽ يقيني بڻائيندي ته اهو عمل پرامن ۽ قانوني طريقي سان مڪمل ٿئي۔ وڏي وزير ٻڌايو ته پنجاب حڪومت پاران سرٽيفائيڊ ٻج جي نقل و حرکت تي پابندي واري فيصلي بابت هن سنڌ جي چيف سيڪريٽري کي هدايت ڪئي آهي ته هو پنجاب جي چيف سيڪريٽري سان ڳالهه ٻولهه ڪري مسئلو حل ڪري۔ ڊينگي وبا تي ڳالهائيندي مراد علي شاهه چيو ته صحت کاتي کي متحرڪ ڪيو ويو آهي ۽ مڪاني ادارن کي هدايت ڪئي وئي آهي ته مڇر مار اسپري جي مهم کي وڌيڪ تيز ڪيو وڃي ته جيئن شهري محفوظ رهن۔
عبدالرشيد چنا
ميڊيا ڪنسلٽنٽ، وزيراعليٰ سنڌ
