ٻه لک سولر سسٽم جي ورڇ شروع ٿي چڪي آهي ۽ پنج لک سولر سسٽم فراهم ڪرڻ جو منصوبو هن سال شروع ٿيندو. سيد ناصر حسين شاهه
ڪراچي، 20 فيبروري: سنڌ جي توانائي واري وزير سيد ناصر حسين شاهه منگهو پير ٽائون جي عبدالله رند ڳوٺ ۾ بجلي جي فراهمي جو افتتاح ڪري ڇڏيو. افتتاحي تقريب ۾ پيپلز پارٽي جي ميمبر قومي اسيمبلي شاهده رحماني، منگهو پير ٽائون جي چيئرمين نواز علي بروهي ۽ ٻيا پيپلز پارٽي اڳواڻ پڻ موجود هئا. ان موقعي تي سنڌ جي توانائي واري وزير سيد ناصر حسين شاهه افتتاحي تقريب کي خطاب ڪندي چيو ته عبدالله رند ڳوٺ منگهو پير ٽائون پاڪستان کان اڳ جي آبادي آهي پر بجلي کان محروم رهيو آهي. عبدالله رند ڳوٺ ۾ 450 کان وڌيڪ گهر آهن، جن کي ڪي-اليڪٽرڪ ذريعي پهريون ڀيرو بجلي فراهم ڪئي پئي وڃي. هن چيو ته بلاول ڀٽو زرداري جو ويزن آهي ته هر گهر کي بجلي فراهم ڪرڻ آهي. چيئرمين بلاول ڀٽو زرداري چاهي ٿو ته گهرن جا مالڪاڻا حق گهر جي
عورتن وٽ هجن، ۽ هر هنڌ موجود سهولتون فراهم ڪرڻ جي ڪوشش ڪئي پئي وڃي. هن چيو ته هتي ويجهو هڪ سولر پارڪ ٺاهيو پيو وڃي، جڏهن ته 200,000 سولر سسٽم جي ورڇ شروع ٿي چڪي آهي ۽ 500,000 سولر سسٽم فراهم ڪرڻ جو منصوبو هن سال شروع ٿيندو. جتي بجلي نه پهتي آهي اتي سولر سسٽم فراهم ڪيا ويندا. هن وڌيڪ چيو ته سولر پارڪ لاءِ ڪوشش ڪئي ويندي ته جيئن مقامي ماڻهن کي هتي روزگار ڏئي سگهجي، هتي نوجوانن کي ٽيڪنيڪل تربيت ڏني ويندي ته جيئن روزگار جا موقعا فراهم ٿين. سستي بجلي سان ڪراچي جي شهرين کي فائدو ٿيندو. سيد ناصر حسين شاهه چيو ته صنعتون پڻ تمام ضروري آهن، پر ماڻهن کي بجلي فراهم ڪرڻ اولين ترجيح آهي. جيڪي ڳوٺ ريگيولرائزڊ ٿيندا انهن تي ڪم جاري آهي. هي نيڪي ۽ روشني جو سفر آهي. اسان هر ڳوٺ کي بجلي فراهم ڪنداسين.
هينڊ آئوٽ نمبر۔۔۔ 237 ايم ايس ايس
